مساعدة

الأسئلة الشائعة

أجوبة سريعة لأكثر الأسئلة اللي توصلنا.

وش هي «سمرة»؟

متجر ألعاب عربية تلعبونها من الجوال، وثلاث أنواع: ألعاب ورق مثل «جاكارو»، وألعاب أسئلة تفتح السوالف وتقرّبكم من بعض، مثل «بيني وبينك» للأزواج، وألعاب تفاعلية تلعبونها بأصابعكم على الشاشة، لحالكم أو مع الجمعة، مثل «اللوح» و«كيرم» و«هقوة». فيها ألعاب مجانية كلها، وفيها ألعاب تجرّبون جزء منها مجاناً.

أحتاج أنزّل تطبيق؟

لا، تلعبون من متصفح الجوال مباشرة، على آيفون أو أندرويد. وإذا تبون، ثبّتوا سمرة على شاشة جوالكم مثل التطبيق، من «ثبّتوا سمرة على جوالكم» في القائمة.

كيف أسجّل دخول؟

بحساب Google اللي في جوالكم: تضغطون «المتابعة مع Google»، تختارون حسابكم، وخلاص. ما فيه كلمة مرور جديدة. أول مرة تكتبون اسمكم في الألعاب، وتختارون يوزر يضيفكم فيه أصحابكم.

لازم أسجّل عشان ألعب؟

إيه، كل الألعاب تحتاج حساب، المجانية منها والجزء المجاني من أي لعبة. التسجيل دقيقة وحدة، وبعده اسمكم وصورتكم وأصحابكم يمشون معكم في كل الألعاب. إلا إذا أحد دعاكم لغرفته بالكود أو الرابط: تدخلون وتلعبون معهم بدون حساب، وما دام أنتم في الغرفة.

ما عندي حساب Google

تقدرون تسوّون واحد مجاناً من موقع Google في دقيقتين.

كيف أضيف أصحابي؟

من «أصحابي» في حسابكم: دوّروا على يوزر صاحبكم وأرسلوا له طلب، أو خلّوه يصوّر الكود اللي في بطاقتكم. أول ما يقبل، تقدرون تدعونه لغرفكم من صفحة الغرفة، ويوصله تنبيه، ويدخل إذا وافق. وتقدرون تعطون أي صاحب لقب يسهّل عليكم البحث، ما يشوفه غيركم، وفي الألعاب يطلع اسمه الحقيقي دايم.

توصلني تنبيهات على الجوال؟

إذا ثبّتوا سمرة على جوالكم، تقدرون تشغّلون التنبيهات من «أصحابي» أو «حسابي»، ويوصلكم تنبيه من سمرة لما أحد يرسل لكم طلب صداقة، أو يقبل طلبكم، أو يدعوكم لغرفة، حتى لو سمرة مسكّرة. في الآيفون لازم تكون سمرة مضافة للشاشة الرئيسية. وتوقفونها من «حسابي» أو من إعدادات الجوال.

وش تشوفون من حسابي في Google؟

اسمكم الأول وإيميلكم ورقم ثابت يميّز حسابكم، بس. ما نشوف كلمة المرور ولا الصور ولا جهات الاتصال، وما ننشر شي باسمكم.

أقدر ألعب لحالي؟

إيه. «اللوح» فيه تحديات وتحدي كل يوم، و«اللوح» و«كيرم» تقدرون تلعبونها ضد الجوال، و«هقوة» فيها رحلة من مكان لمكان، و«تحدي الميزان» فيه تحدي كل يوم.

فيه إعلانات؟

لا، ما عندنا إعلانات أبدًا، حتى في الألعاب المجانية. وفي «كيرم» تقدرون قريب تشترون أشكال للمضرب واللوح، تغيّر الشكل بس وما تعطي أي أفضلية.

وش يعني «مجانية لين …»؟

فترة نفتح فيها الألعاب كاملة للكل. بعدها ترجع النسخة المجانية، إلا إذا اشتريتوها.

الدفع آمن؟

إيه، الدفع يتم في صفحة بوابة دفع سعودية مرخّصة، وبيانات بطاقتك ما توصلنا أبدًا.

وش طرق الدفع المتاحة؟

مدى، وApple Pay، وفيزا وماستركارد. وSTC Pay إذا كانت بوابة الدفع تدعمه. والدفع مرة وحدة، مو اشتراك.

نقدر نكمل من جوال ثاني؟

في «بيني وبينك» و«نفس تفكيري»، إيه: سجّلوا دخول بنفس الحساب ويكمل تقدّمكم. باقي الألعاب تنحفظ على الجوال اللي تلعبون فيه.

نقدر نلعب كل واحد من جواله؟

إيه، في كل ألعابنا التفاعلية. واحد منكم يفتح غرفة من حسابه، والباقين يصوّرون الكود أو يفتحون الرابط ويدخلون باسمهم، بدون حساب ولا تحميل. وصاحب الغرفة يقدر يدعو أصحابه من الغرفة نفسها.

بياناتي خاصة؟

نعم. الأسماء اللي تكتبونها في لعبة على جوال واحد تبقى على جهازكم بس وما توصلنا. وإذا لعبتوا كل واحد بجواله، اسمكم يطلع للي معكم في الغرفة بس، وينمسح معها. وإذا حطيتوا صوركم بدل الرسمة، تنربط بحسابكم وتنحفظ فيه مشفّرة وتطلع لكم في أي جهاز تدخلون منه، جوال أو كمبيوتر، وما تطلع إلا لكم ولأصحابكم وللي معكم في الغرفة. وما عندنا إعلانات ولا تتبّع. التفاصيل في سياسة الخصوصية.

إذا ما عجبتنا اللعبة، أقدر أسترجع فلوسي؟

إيه، خلال ٧ أيام من الشراء إذا لعبتوا أقل من ١٠ أسئلة أو كروت، أو لعبة وحدة بس من «اللوح»، أو في أي وقت إذا فيه مشكلة تقنية ما قدرنا نحلها. التفاصيل في سياسة الاسترجاع.

متى تنزل ألعاب العائلة والربع؟

قريب إن شاء الله، «جَمعة أهل» للعائلة و«ربعنا» للأصحاب. اضغطوا «نبّهني لما تنزل» على بطاقتها، ونعلمكم أول ما تنزل.

انخصم المبلغ وما ظهرت اللعبة، أو انخصم مرتين. وش أسوي؟

إذا اللعبة ما ظهرت، افتحوا «ألعابي» وتأكدوا إنكم داخلين بنفس حساب Google اللي اشتريتوا منه. إذا للحين ما ظهرت، أو انخصم المبلغ أكثر من مرة، اكتبوا لنا من حسابكم واذكروا اسم اللعبة ووقت الدفع تقريباً.

ما قدرت أدخل حسابي، وش أسوي؟

جرّبوا «المتابعة مع Google» واختاروا الحساب اللي استخدمتوه في سمرة. إذا ما قدرتوا تدخلون، تلقون خيار البريد في تواصل معنا.

اللعبة علّقت أو ما تفتح، وش أسوي؟

إذا استمرت المشكلة، اكتبوا لنا من حسابكم واذكروا اسم اللعبة ووش كنتوا تسوّون قبل ما تصير المشكلة. تقدرون ترفقون معلومات الجهاز من نفس الرسالة.

ما لقيتوا جوابكم؟ تواصلوا معنا من حسابكم.